Состоялся вечер памяти к 100-летию со дня рождения А.М. Джимбиева

Бар сарин 6-д хальмг келн-улсин әңгин кѳдләчнр «Зѳргтә салдс, билгтә бичәч болн журналист» нерәдлһтә Хальмг улсин бичәч, шүлгч, орчулач, дамшлтта седкүлч, Хальмг Таңһчин сойлын ачта көдләч, Хальмг Таӊһчин күндтә иргн, Элст, Лагань балһсмудин, Яшкуль селәнә күндтә иргн, Тѳрскән Харсгч дәәнә ветеран, Җимбин Андрейин 100-н җилин өөнд нерәдгдсн санлын асхн давулв.

Әрәсән бичәчнрин Ниицәнә әңгин гешүн, шүлгч, орчулач Эрдни Канкаев керг-үүлдвриг нүр үг келҗ, секв. Хальмг утх-зокъялд темдгтә орман эзләд, ик тәвцән орулсн бичәч, хальмг келн-улслаһан җирһлин күнд хаалһиг давҗ һарсн күн. Үүдәврмүдән маднд зѳѳр болҗ үлдәв. Бичәч олн җилин туршарт насн-җирһлән әрвллго, баатр кевәр уралан зөрҗ, таңһчиннь олн-әмтнәннь төлә, нег үлү дорас өсч йовх үйнрин төлә аһу ик көдлмш кеҗ йовсн күн бәәснь темдглв.

Керг-үүлдврт Әрәсән бичәчнрин Ниицәнә гешүд, хальмг улсин шүлгчнр Владимир Нуров, Григорий Кукарека, Әрәсән бичәчнрин Ниицәнә ахлач, шүлгч Татьяна Бадакова, шүлгч, орчулач Василий Чонгонов, утх-зокъялын шалһач, шүлгч, орчулач, филолог номин доктор Римма Ханинова, шүлгч, орчулач Раиса Шурганова, зурач Сергей Бадендаев болн бичәчин күүкнь Надежда Джимбиева, ѳѳрхн элгн-саднь, багшнр болн сурһульчнр орлцв.

Дегтрин саңгин һардач Майя Безидеева ирсн гиичнриг халунар тосв. Бичәчин 100-н җилин ѳѳнд нерәдсн «Андрей Манганыкович Джимбиев – воин, писатель, журналист» гидг библиографическ заавр хальмг келн-улсин әңг белдәд һарһсна тускар келв. Нег зааврин экземпляр бичәчин күүкд Надежда Андреевнад белглв.

Хальмг улсин шүлгч Владимир Нуров ах үүриннь санлд бичсн шүлгән умшад, җирн җилин туршарт кен-негән медҗ, литературн нег хаалһар йовҗ, үүдәврмүдәснь үлгүр авч, ямаран йоста багш, седкүлч, дәәч күн билә гиҗ келв.

Шүлгч, номт Римма Ханинова бичәчин үүдәврмүдин тускар эврәннь белдсн докладан умшв. Бичәч дәәнә цагин туск ямаран дегтрмүд бичҗ, Хулхутын болн Яшкулин, Приютн, Сталинградын эргнд болсн аврлт уга дәәлдәнә, терүнд орлцҗасн эврәннь арвн йистә-хѳртә үүрмүдән тодлҗ, тедниг романмудын дүрмүдт хүврҗ бичснә тускар келв. Сиврин туск күчр-күнд бәәдл-җирһлин туск ямаран үүдәврмүд бичсн тускар бас келв.

Шүлгч, орчулач, зурач Раиса Шурганова бичәчин санлд бичсн «Бичкн багш – Дәәч» гидг шүлгән хальмг болн орс келәр умшв.

Баахн бичәчнрин Ниицәнә нерн деерәс Евгения Решетникова Андрей Манганыковичин шүлгиг хальмг келнәс орчулад бичәчин күүкнд Надежда Андреевнад белглв.

А. Цебековин нертә Государственн хорин дууч Данзан Зулаев «Нүүдлә» дууг дуулв. Бичәчин дәәч-үр болсн Бадм Джимбиев эн дууг бичсмн. Әәдрхн госпитальд хамдан эмнлһнд бәәсн цагт Бадм эн дууг бичсмн. Ода дун олн-әмтнә дун болҗ мѳңкрв. «Хоңһрин ачнр уралан» гидг дәәнә цагин туск марш дуулв.

Харһлтд Элст балһсна 4-гч , 12-гч школмудын, техническ лицейин хальмг келнә багшнр сурһульчнрта хамдан орлцв. Хальмг утх-зокьялмудын кичәлмүдтән Җимбин Андрейин ямаран үүдәвмүд кѳтлврт ордгнь, ямаран керг-үүлдврмүд давулсна тускар тодрхаһар 4-гч тойгта хальмг келнә багш Тамара Нимеева келҗ ѳгв. Тамара Манджиевна шүлгүд бичдгән дурта, Андрей Манганыковичд «Эңкр балһсан сулдхсн бичәчд» гидг нерәдсн шүлгән умшв. Сурһульчнр бас дәәнә туск, теегин туск бичәчин шүлгүд умшч ѳгв.

Хальмг билгтә үрн хурц үгәр бичгдсн 40 шаху үүдәвр урн үгин утх-зокъялд зѳвтә орман олад, бичсн үүдәврмүднь зѳѳр болҗ хадһлҗ үлдсмн.