Краеведческий час к 95-летию со дня рождения народного поэта Калмыкии Егора Буджалова
Бар сарин 16-д хальмг келн-улсин әңгин кѳдләчнр «В. А. Бембетовин нертә 10-гч тойгта школд «Теегм – һарһсн экм» гидг нерәдлһтә Хальмг улсин шүлгч, драматургч, орчулач, Хальмг Таңһчин күндтә иргн, Хальмг Таңһчин сойлын ачта кѳдләч, СССР-ин бичәчнрин Ниицәнә гешүн Буджала Егорин 95-н җилин ѳѳнд нерәдгдсн бүлән харһлт давулв.
Буджала Егор хальмг теегтән, тѳрскн таңһчдан цань уга дурта, халуч, у-ѳргн седклтә күн билә. Энүнә үүдәсн дегтрмүднь – тѳрскн урн үгин литературин кѳрңд алтн зѳѳр болҗ үлдв. Шүлгч дурна, җирһлин, үклин, йиртмҗин бәәдлин туск шүлгүдтән эврәннь ухан-седклән илдкҗ медүлв. Төрскн теегтән кемҗән уга дурта бәәсмн. «Теегм нанд әмнәсм эңкр», «Күслдм – бат тулг», « Теегм – мини урмдм», «Теегм – мини җирһлм», «Орчлңд әмнәсм үнтә ор һанцхн одм!» – гиҗ шүлгч заячнь заасн теегтән үрнә седклән медүлҗ бичсн шүлгүднь герлтсн бәәнә.
Ирсн гиичнриг хальмг келнә багшнр Ю. А. Бембеева, Е. Х. Бадмагоряева болн сурһульчнр альхан ташад, тосв. Дегтрин саңгин кѳдләч Р. П. Эрднешкиева шүлгчд нерәдсн дегтрин һәәхүл белдв.
Шүлгч, орчулач, драматургч, Әрәсән бичәчнрин Ниицәнә гешүн Раиса Шурганова Егор Андреевичин бичсн шүлгүдин, үүдәлтин тускар келәд, хальмг болн орс келәр шүлгүд күүкд умшч ѳгв. «Хальмг келән мартлго, келән дасч автн», – гиҗ, күүкдт селвг, үрвр ѳгв.
Буджала Егорин ѳѳрхн элгн-садн, җичнь, «Байрта», «Теегин герл» седкүлин корреспондент Савр Буджалов бас ѳвк-аавиннь тускар, ѳрк-бүлин тускар келҗ ѳгв. Шүлгчин үүдәсн онц тѳр, Сиврин туск үүдәврмүдин тускар, яһҗ хальмг әмтн киитн Сиврт бәәһәд, түрү-зүдү, зовлң күн болһн дааһад, хальмг һазрурн күрч ирснә тускар бичсн «Үүдән тәәлтн хальмгуд!», «Канскд болсн йовдл», «Канскд би бәәләв», Сивр» гидг үүдәврмүдин тускар күүкдт келҗ ѳгв. Дәкәд Буджала Егор һазадын орнд үүлдҗ йовсн хальмг бичәчнрин нердиг түрүн болҗ сергәһәд, умшачнрт теднә үүдәврмүдинь барлҗ күргв. Бийнь йирдгч җилмүдт Америкүр хойр дәкҗ гиичлҗ одхларн, тенд бәәдг хальмгудла өөрхн таньлдҗ, нертә номтнрин, бичәчнрин үүдәсн соньн тоотсинь авч ирәд, «Теегин герл» седкүлд барлла. Тедн дунд Санҗ Балыковин, Муушан Һәрән, Араш Борманжиновин, Кольдонга Содномин болн нань чигн сегәтнрин соньн, эврә хәләцтә үүдәврмүд бәәснә тускар ачнь күүкдт келҗ ѳгв.
Ашлврт багшнр болн сурһульчнр ирсн гиичнрт, дегтрин саңгин кѳдләчнрт ик ханлтан ѳргв.
Просто замечательно. Нашим внукам, правнукам надо почаще «открывать глаза» на творчество наших поэтов, писателей и не обязательно по каким определённым датам, а главное подходить к этому не формально, а от души, от сердца, чтобы заинтересовать, «зацепить» нынешнее клиповое поколение.